2025 жылы Түркістанда Ислам институты ашылады

Түркістанда 2025 жылы Ислам институты ашылады деп хабарлайды Түркістан облысы әкімінің баспасөз қызметіне сілтеме жасап Orda.kz. 

«Қаладағы ҚМДБ имамдарының біліктілігін арттыратын, институт жұмысын ұйымдастырудың жол картасын әзірлейтін, штаттық кестені қалыптастыратын және бекітетін, өңірдегі мешіт қызметкерлерінің біліктілігін қадағалайтын және қажет болған жағдайда біліктілігін арттыру курстарын ұйымдастыратын Ислам институтын ашу туралы шешім қабылданды» деп жазылған хабарламада.

Түркістан облысы әкімінің орынбасары Ертай Алтаев бұл орталықты ғылыми-зерттеу институты ретінде тіркеу мүмкіндігін қарастыруды ұсынды.

«Бүгінде дін саласындағы қызметкерлердің білім деңгейі мен біліктілігін арттыру маңызды. Сондықтан біліктілік арттыру курстарына дін, тарих, мәдениет, философия және басқа да ғылым саласындағы танымал сарапшылар мен спикерлерді тарту қажет. Алдағы уақытта Қожа Ахмет Ясауи мұрасына арналған халықаралық конференциялар өткізу жоспарлануда және олардың нәтижелерін алдағы жұмыстарға пайдалану маңызды. Түркістандағы мықты теологтар мен профессорлардан білім алу арқылы діни қызметкерлер дамып, халыққа тиімді қызмет ете алады деп ойлаймын», – дейді Ертай Кенжебекұлы.

Деректерге сүйенсек, бұл институт биыл ашылады деп күтілуде. Бұл орталықта Қожа Ахмет Ясауи еңбектері мен хикметтері бойынша ғылыми-зерттеу жұмыстары жүргізіліп, Түркістан, Жамбыл, Қызылорда, Ұлытау облыстары мен Шымкент қаласында қызмет ететін имамдардың біліктілігін арттыру курстары ұйымдастырылады.

Сонымен қатар, олар тарихтан, классикалық шығармалардан дәріс беріп, діни мәселелерді түсіндіру қабілетін жетілдіретіні айтылды.