2025 жылғы грант иегерлері белгілі болды

Ғылым және жоғары білім министрлігі 2025–2026 оқу жылына арналған мемлекеттік білім беру грант иегерлерінің тізімін жариялады, деп хабарлайды Orda.kz.

Мемлекет басшысы Қасым-Жомарт Тоқаевтың тапсырмасына сәйкес, биылғы гранттардың 60 пайызы инженерлік және техникалық мамандықтарға бөлінді. Бұл шешім экономиканың басым бағыттары үшін білікті мамандар даярлау қажеттілігімен байланысты.

Конкурс нәтижесінде мемлекеттік тапсырыстың 99 пайызы игерілді.

Министрліктің мәліметінше, биыл «Серпін» бағдарламасына қатысуға ниетті жастардың саны артқан. Нәтижесінде 2 мыңнан астам түлек еліміздің солтүстік, шығыс және орталық өңірлеріндегі жоғары оқу орындарына қабылданады.

«AMANAT» партиясының сайлауалды бағдарламасын іске асыру жөніндегі Жол картасы аясында 77 мыңнан астам грант бөлінді. Сонымен қатар, шетелдік жетекші университеттермен серіктестікте жұмыс істейтін еліміздің 20-ға жуық жоғары оқу орны студенттерді қабылдауға кірісті. Бұл — Қазақстанды өңірлік білім беру орталығына айналдыру жолындағы маңызды қадам.

2025 жылғы конкурсқа 113 мыңға жуық өтініш келіп түсті. Бұл өткен жылмен салыстырғанда 9 мыңға көп. Гранттарды бөлу кезінде әлеуметтік осал топтарға арналған заңмен белгіленген квоталар сақталған.

Дарынды жастарды қолдау мақсатында халықаралық олимпиадалар мен спорттық жарыстардың жеңімпаздарына конкурссыз грант беру көзделген.

Жоғары білімге қолжетімділікті арттыру үшін қосымша тетіктер іске қосылды. Атап айтқанда, Мемлекет басшысының тапсырмасымен 5 жасар балаларға есепшот ашу кезінде бастапқы білім беру капиталы төленетін «Келешек» жинақ жүйесі енгізілді. Жүйе аясында мемлекеттік қолдаудан бөлек, екінші деңгейлі банктер мен сақтандыру ұйымдарының сыйақысы төленеді. Жиналған қаражатты «Ұлттық қор – балаларға» жобасы аясындағы қаражатпен біріктіруге болады.

2024 жылы алғаш рет оқуға жұмсалатын шығындардың бір бөлігін өтеуге арналған сараланған гранттар тағайындалды. Қалған соманы талапкерлер өз қаражаты немесе жеңілдетілген оқу несиесі арқылы өтей алады. 2025 жылы мұндай гранттар саны 300 болады. Конкурс биылғы қыркүйек айында өтеді.

Биыл алғаш рет мерзімді әскери қызмет атқарып жүрген азаматтарға 2010 білім беру гранты бөлінді. Мақсат — әскери қызметін аяқтаған жастардың жоғары білімге қол жеткізуін қамтамасыз ету және олардың азаматтық өмірге бейімделуіне жағдай жасау.

Грант иегерлерінің толық тізімі министрліктің ресми сайтында, сондай-ақ Telegram-арналарында және Ұлттық тестілеу орталығының www.testcenter.kz сайтында қолжетімді.

Мемлекеттік білім беру гранты туралы куәлікті үш жұмыс күні ішінде https://grant.testcenter.kz сайтынан жүктеп алуға болады.

Жоғары оқу орындарына құжат тапсыру 25 тамызға дейін жүргізіледі.