2025-2030 жылдарға арналған өңірлік даму тұжырымдамасы жобасында шағын қалаларды көтеру қарастырылды

Қазақстанда 2025-2030 жылдарға арналған өңірлік даму тұжырымдамасының жобасы әзірленуде, деп хабарлады бірінші вице-премьер Роман Скляр.

«Ұлттық экономика Министрлігі 2025-2030 жылдарға арналған барлық елді мекендерді одан әрі дамыту, оның ішінде шағын қалаларды дамыту жөніндегі шараларды көздейтін өңірлік даму тұжырымдамасы жобасын әзірлеу бойынша жұмыс істеп жатыр (Ұлттық құрылтайдың төртінші отырысының қорытындылары бойынша бекітілуіне сәйкес қабылдау мерзімі 2026 жылғы ақпан)», - деді Скляр мәжіліс депутаттарының шағын қалаларды, атап айтқанда, Қарқаралы қаласын тиімді дамыту бойынша шаралар қабылдауға қатысты сауалына жауап бере отырып.

Оның айтуынша, моно- және шағын қалаларда инженерлік және көлік инфрақұрылымын дамыту мақсатында 2022-2025 жылдар аралығында Ұлттық экономика министрлігінің бюджеттік бағдарламасы аясында республикалық бюджеттен 94,7 млрд. теңге бөлінді. Министрлер кабинеті басшысының бірінші орынбасары атап өткендей, қаражат ТКШ саласындағы 73 жобаны және көше-жол желілерін жаңғырту бойынша 70 жобаны іске асыруға мүмкіндік берді.

«Аталған бағдарламаға сәйкес, Қарқаралы қаласында төрт инфрақұрылымдық жобаны іске асыруға (тұрғын үйлерге инженерлік инфрақұрылым тарту, Жарлы-Қарқаралы топтық су құбырының құрылысы, қаланы абаттандыру, сондай-ақ Т.Әубәкіров көшесін қайта жөндеу) мемлекеттік бюджеттен 3,6 млрд. теңге бөлінді. Сонымен қатар, Қарқаралы қаласында су құбыры желілерінің ұзындығы 32,1 шақырым, кәріз желілері - 15,5 шақырым, жылу желілері - 11,31 шақырым болады, ал халықты электрмен қамтамасыз ету 100% болады. Өңірлік стандарттар жүйесіне сәйкес, 2024 жылдың қорытындысы бойынша шағын қалалар үшін нысанмен және қызметтермен қамтамасыз ету деңгейі 88,4% (ҚР бойынша орташа 89%), моноқалалар үшін 89,3% (ҚР бойынша орташа 89%) құрады. ӨҚҚ жоғары қамтамасыз етілуі Жаркент (95,4%), Саран (95,3%) және Қарқаралы (93,6%) қалаларында байқалады», - деп нақтылады Скляр.