2024 жылы үміткерлер көп таңдаған мамандықтар

Қазақстанның 2024 жылға арналған мемлекеттік білім гранттарының қорытындылары таныстырылды, деп хабарлайды ҚР Ғылым және жоғары білім министрлігінің баспасөз қызметі.

Ең ірі конкурс «Стоматология» мемлекеттік білім беру бағдарламасын таңдаған талапкерлер арасында өтті – бір орынға 35 адам таласты. Одан кейінгі орында «Халықаралық қатынастар және дипломатия» (11 адам), «Дене шынықтыру мұғалімдерін даярлау» (10 адам), «Аударма ісі» және «Психология» (тоғыз адам).

Үміткерлер арасында ұпайлары тең болған жағдайда басым құқығы бар 22 мыңнан астам талапкер, атап айтқанда «Алтын белгі»  иегерлері, халықаралық және республикалық олимпиадалардың жеңімпаздары, оқу озаттары жеңіске жетті.

Жоғары оқу орындарына қабылдау 25 тамыз күні аяқталады. Мемлекет басшысының тапсырмасы бойынша оқу ақысын ішінара төлейтін сараланған гранттар алғаш рет 2024 жылы енгізілген болатын.