2024 жылы елімізде іздеуде жүрген 2 мыңға жуық күдікті ұсталды

2024 жылы қазақстандық полицейлер түрлі қылмыс жасады деген күдікпен 1949 адамды ұстады, із-түзсіз жоғалған 1361 адамның жүрген жерін анықтады, деп хабарлайды ҚР Ішкі істер министрлігінің ресми интернет-ресурсына сілтеме жасап Orda.kz.       

«2024 жылы Ішкі істер министрлігі Қазақстанның құқық қорғау органдары тізімінде іздеуде жүрген 1949 күдіктіні ұстады. Сонымен қатар, 1361 із-түзсіз жоғалған адамның мекен-жайы анықталды» деп жазылған хабарламада. 

2024 жылы құқық қорғау органдары кісі өлтіру бойынша – 43, қарақшылық – 22, денсаулыққа ауыр зиян келтіру – 37, зорлау – 6, тонау – 68, бопсалау – 21, ұрлық – 484, есірткі қылмыстары бойынша – 91 күдікті ұсталды. ТМД елдері мен алыс шетелдер бойынша 844 қылмыскер ұсталды.

Мәселен, Шымкентте мемлекетаралық іздеуде болған 52 жастағы ер адам ұсталды. Ол 2023 жылдың қараша айында қарызын өтей алмағандықтан қала тұрғынына тапаншадан оқ атқан.

 Семейде ұсталған тағы бір күдікті, тергеушілердің айтуынша, Алматыда қоғамдық көлікте қалта ұрлығымен айналысқан. Оған және оның сыбайластарына 42 қылмыстық әрекет бойынша айып тағылып отыр.