2024 жылдан бастап жұмыс беруші міндетті зейнетақы жарнасын төлейді

ҚР Еңбек және халықты әлеуметтік қорғау министрлігі алқасының кеңейтілген отырысында Тамара Дүйсенова келесі жылдан бастап жұмыс берушілерден міндетті жарналар түсе бастайтынын айтты.

— 2024 жылдан бастап жас салымшыларды шартты жинақтаушы зейнетақы жүйесін қалыптастыру үшін жұмыс берушілерден міндетті зейнетақы жарналары енгізіледі, - деді министр.

Ол Қазақстанда жүйеге қатысу мерзіміне байланысты зейнетақы және сақтандыру төлемдерін кезең-кезеңмен арттыру жалғасатынын атап өтті.

— Мемлекет басшысының тапсырмасына сәйкес биылғы жылы қабылданған зейнетақы жүйесіне енгізілген өзгерістер азаматтарды бұрынғы табысының кем дегенде  40 пайызы көлемінде зейнетақымен қамтамасыз етуге мүмкіндік береді. Барлығы зейнеткерлердің базалық зейнетақының ең төменгі мөлшерін алудан басталды. Биыл осы санаттағы зейнеткерлердің ғана базалық зейнетақысы 21 пайызға дейін көтерілді. 5 жыл ішінде, яғни 2023 жылдан 2027 жылға дейін кезең-кезеңімен ұлғайту жүзеге асырылады, бұл өткен жылғы инфляция мен оның келесі жылдарға болжамды дәлізін жабуға мүмкіндік береді, - деді Дүйсенова.

Министр дәл осындай жұмыс әлеуметтік сақтандыру жүйесінде де жүргізілетінін атап өтті. Биыл жұмыссыз қалғаны үшін төленетін әлеуметтік төлемдер бұрынғы табыстың 45%-ына дейін ұлғайтылады.