2024 жылға қарай Қазақстанда темекі қымбаттайды

Ұлттық экономика министрі Әсет Ирғалиев темекі бағасының 2024 жылға дейін кезең-кезеңімен көтерілуі туралы айтты.

Мәжіліс депутаттары ЕАЭО елдерінің темекі өнімдеріне акциздер саласындағы салық саясатының қағидалары туралы келісімді ратификациялауды мақұлдады.

Ұлттық экономика министрі Әсет Ирғалиев акциздер ставкаларының конвергенциясы 2024 жылдан бастап жүзеге асырылатынын айтты.

— Әр бес жыл сайын бірыңғай индикативті мөлшерлеме және одан ауытқу ауқымы белгіленеді. 2024 жылы темекінің индикативті ставкасы ұлттық валютада 1000 дана үшін 35 еуроға баламалы болып белгіленді, деді.

Қазір Қазақстанда темекіге салынатын акциздердің бағасы 11 100 теңге деңгейінде немесе 1000 дана үшін 1 қаңтардағы бағам бойынша 21,5 еуро.

— Үйлесімділікке қол жеткізу үшін темекіге акциздердің нақты ставкалары 2024 жылы индикативті бағадан 20%-дан төмен және жоғарыға ауытқуы мүмкін. Заң жобасы темекі өнімдеріне акциздер мөлшерлемесін арттыру арқылы бюджетке қосымша кірістер әкеледі, деп түсіндірді министр.

Акциздер мөлшерлемесінің күрт өсуі болмайды деп атап көрсетілген. Салық кодексінде қазірдің өзінде 2021-2022 жылдарға арналған акциз ставкалары қарастырылған. 2021 жылы 21,5 еуро, 2022 жылы 24 еуро. Егер 2021 жылғы кірістерді 2024 жылмен салыстыратын болсақ, онда темекіге салынатын акциз ставкасынан бюджетке түсетін түсім 27% - ға өседі.

Министрдің айтуынша, акциз ставкалары тек темекіге ғана өседі және темекі өнімдерінің басқа түрлеріне қолданылмайды.

Акциз - бұл тұтыну тауарларына өндіріс кезінде ішкі нарықта салынатын жанама салық.