2024-2025 жылдары баспана тапшылығы болуы мүмкін – құрылысшылар одағы

Қазақстан құрылысшылар одағының басшысы Талғат Ерғалиев елде күзге қарай құрылыс материалдарының бағасы қымбаттайды деген болжам жасады.

«Құрылыс материалдары нарығындағы өндірістік және сауда-саттық тұрақсыздыққа байланысты бүгінде көптеген компаниялар жоспарларын қайта қарап, құрылыс көлемін қайта есептеп жатыр. Сондықтан алдағы уақытта, 2022 жылы болмаса, 2024-2025 жылдары баспана тапшылығы сезілуі мүмкін» деді Талғат Ерғалиев.

Маманның айтуынша, құрылысқа қажетті негізгі материалдар сырттан әкелінеді. Демек, оның бағасы қазіргіден де қымбаттауы мүмкін.

«Кейінгі 7 жылдағы жағдайды алып қарасақ, сол арқылы алдағы уақытқа болжам жасасақ, баспана нарығындағы инфляция 12-14 пайыз болып, құрылыс материалдарының бағасы кемінде 10-15 пайыз қымбаттайтынын көреміз. Сондықтан ахуал тұрақтана қоймайды. Керісінше осы қарқынмен шиеленісуі мүмкін» деді Ерғалиев.

Ол өз болжамын былай түсіндірді.

«Ресейге қарсы салынып жатқан санкциялардың құрылыс нарығына түсіретін шынайы салмағын біз тамыз-қазан аралығында сезінеміз. Әзірге материал мен тауардың қоры жеткілікті. Бірақ шамамен күзден бастап санкциялардың шынайы әсерін көреміз. Осы кезде құрылыс бағасы қайта қымбаттайды» деді құрылысшылар одағының басшысы.

Еске салсақ, бұған дейін Құрылысшылар қауымдастығының басшысы Виктор Микрюков алдағы екі айда баспана қымбаттамайтынын айтқан.