2023 жылы зейнетақы мен жәрдемақы мөлшері қандай болады?

ҚР Еңбек және халықты әлеуметтік қорғау министрлігі биылғы жылғы зейнетақы мен жәрдемақы көлемін таныстырып, бұл мақсатқа 4,6 триллион теңге бөлінгенін хабарлады.

2023 жылдың 1 қаңтарынан бастап Қазақстанда 4,4 миллион алушыға зейнетақы мен жәрдемақылардың барлық түрлерінің мөлшері ұлғаяды. Еңбек министрлігі бұл мақсатқа республикалық бюджетте 4,6 триллион теңге қарастырылғанын хабарлады.

- Базалық зейнетақының мөлшері ең төменгі күнкөріс деңгейінің жыл сайынғы өсуін ескере отырып, сондай-ақ мемлекет басшысының тапсырмасына сәйкес оның ең ең төменгі күнкөріс деңгейінен 54%-дан 60%-ға дейін ұлғаюына байланысты өсті. Ынтымақты зейнетақы мөлшері инфляция деңгейінен бұрын 2 пайызға өсті. Сонымен қатар, ынтымақты зейнетақыны есептеу үшін қолданылатын ең жоғары табыс мөлшері 46-дан 55 АЕК-ке, яғни 158,7-ден 189,8 мың теңгеге дейін ұлғайтылды, - деп түсіндірді министрлік.

Нәтижесінде бюджеттен төленетін зейнетақы төлемдерінің ең төменгі мөлшері 68,2-ден 77,4 мың теңгеге дейін өсті. Зейнетақыны көтеру 2,2 миллион зейнеткердің барлығын қамтыды.

Сонымен қатар мүгедектік және асыраушысынан айрылу бойынша жәрдемақы көлемі ұлғайтылды.

- Осылайша, жұмыс істейтін әйелдерге де, жұмыс істемейтін әйелдерге де, бала туылуына төленетін мемлекеттік қолдаудың мөлшері қазір: бірінші, екінші және үшінші балаға 38 АЕК немесе 131 100 теңгені құраса, 2022 жылы 120 840 теңгені құрады; төртінші және одан жоғары балаға – 63 АЕК немесе 217 350 теңге, 2022 жылы – 200 340 теңге, – делінген хабарламада.

Сонымен қатар, республикалық бюджеттен жұмыс істемейтін ата-аналарға бала күтімі бойынша жәрдемақы тағайындалады, оның мөлшері де АЕК өсімін ескере отырып, биылдан бастап 8,5%-ға өсті.

Жұмыс істейтін ата-аналар мемлекеттік әлеуметтік сақтандыру қорынан бала күтімі бойынша әлеуметтік төлемдер алады. Биылдан бастап бала күтімі бойынша төлем мерзімі бір жылдан бір жарым жылға дейін ұлғайтылды.

Қазақстанда мүмкіндігі шектеулі балаларды қолдау үшін олар кәмелеттік жасқа толғанға дейін арнайы мемлекеттік жәрдемақы төленеді. Оның мөлшері 2023 жылы 56 794 теңгені құраса, бұрын 52 345 теңге болатын.

Жаңа жылда көп балалы отбасыларға берілетін жәрдемақы мөлшері де АЕК өсімін ескере отырып өсті: төрт балалы отбасыларға ай сайын 55 304 теңге төленетін болады, бұрын бұл сома 50 976 теңге болатын; бес балаға – 69 138 теңге, бұрын төленген 63 728 теңге; алты баламен – 82 973 теңге, бұрын – 76 479 теңге; жеті баламен – 96 807 теңге, бұрын – 89 231 теңге; және әрбір сегізінші және одан кейінгі балаға – 13 800 теңге болды, бұрын – 12 720 теңге болған.