2021-2022 оқу жылына білім беру гранттарының қорытындысы шықты

Қазақстан Республикасы Білім және ғылым министрлігі 2021-2022  оқу жылына білім беру гранттарының қорытындысын жариялады.

Бұл туралы  Orda.kz    хабарлады.       

2021-2022 оқу жылында бакалавриатқа түсу үшін 56 мыңнан астам грант бөлінді. Биыл Президенттің тапсырмасы бойынша гранттардың жалпы саны 5000-ға артты. Білім беру гранттарын тағайындау конкурсына қатысу үшін өтініштерді қабылдау 13 шілдеде басталып, 20 шілдеге дейін жалғасты.

Білім беру гранттары ҚР Еңбек және халықты әлеуметтік қорғау министрлігінің деректеріне және жұмыс берушілердің сұранысқа ие мамандықтар туралы ақпаратына сәйкес бөлінді.

Гранттардың ең көп саны инженерлік, өңдеу және құрылыс салаларына бөлінді – 17 028 грант. Педагогикалық ғылымдар – 9573 грант, ақпараттық – коммуникациялық технологиялар – 7487, жаратылыстану ғылымдары – 4088, ауыл шаруашылығы ғылымдары – 1895, денсаулық сақтау саласындағы мамандықтарға – 2700, өнер және гуманитарлық ғылымдар – 1615, бизнес, басқару және құқық – 1223, әлеуметтік ғылымдар, журналистика және ақпарат мамандықтарына 960 грант бөлінді.

«Мәңгілік ел жастары – индустрияға» («Серпін») бағдарламасы шеңберінде де гранттар қарастырылған.  

Студент аталып отырған жастар ЖОО тіркелу үшін  құжаттарын 25 тамызға дейін бере алады.

2021-2022 оқу жылындағы білім беру гранттары мен биылғы грант иегерлерінің толық тізімі ашық дереккөзде орналастырылған.