2020 жылы 3 мыңға жуық алматылық үй алды

Өткен жылы Алматыда қол жетімді баспанамен қамтамасыз ету жұмыстары бірнеше мемлекеттік және қалалық тұрғын үй бағдарламалары бойынша жүзеге асты. Мәселен, «Алматы жастары» бағдарламасы аясында жас отбасыларға 949 пәтер берілді.

Бұл бағдарламаға білім, денсаулық сақтау, мәдениет, спорт, әлеуметтік салалар мен БАҚ-та жұмыс істейтін  жастар, сонымен қатар ЖОО мен ҒЗИ-ның қызметкерлері қатысты.

«Шаңырақ» бағдарламасының шарттарына сәйкес кезекте тұрғандар 432 пәтер алған. Ал,  «Тұрғынүйқұрылысжинақбанкі» арқылы жеңілдетілген несие шарттары бойынша 360 отбасы баспаналы болды.

Көпбалалы және толық емес отбасылардың, сондай-ақ мүгедек балаларды тәрбиелеп отырған отбасылардың өкілдері «Бақытты отбасы» бағдарламасы бойынша жыл ішінде 365 пәтер алды.

Коммуналдық тұрғын үй қорынан 429 пәтер халықтың әлеуметтік осал топтарының өкілдері мен көп балалы отбасыларға бөлінді.

Өткен жылы барлығы 2535 алматылық отбасы қол жетімді баспанамен қамтамасыз етілді.. Бағдарламалардың шарттары және ағымдағы хабарландырулармен Алматы қаласы тұрғын үй саясаты департаментінің uzh-almaty.kz сайтында танысуға болады.