2017 жылы іске қосылуы керек шыны зауыты қолданысқа беріледі

Қызылордада «Orda Glass Ltd» шыны зауытының балқыту пеші жанды.

«Бәйтерек» холдингінің баспасөз қызметі бұл зауыт іске қосылғанға дейінгі сынақ кезеңі екенін айтты.

Ұлттық холдингтің басқарма төрағасы Айдар Арифхановтың айтуынша, шыны өндірісі бойынша әлемдік көшбасшы King Charm Development Limited-тен стратегиялық инвестор тартылған.

Құрылысты қытайлық King Charm Development Limited компаниясы аяқтап жатыр. 2017 жылдың тамыз айында Orda Glass Ltd және China Triumph International Engineering Group Co., Ltd (CTIEC) арасында нысандағы құрылыс-монтаждау жұмыстарын 2018 жылдың 1 тамызына дейін аяқтау туралы келісімшартқа қол қойылды.

Бұрынғы мердігер «Шымкентхиммонтаж» ЖШС міндеттемелерді тиісінше орындамағаны және сапасыз орындалған жұмысы үшін жұмыстан босатылған.

«Зауыт құрылысын аяқтау мерзімі жыл сайын бірқатар себептерге байланысты кейінге қалдырылды. Оның ішінде қатысушылардың жобадан шығуы, коронавирустық індет, мердігердің мерзімін өткізіп алуы, ақауларды жою және т.б. Енгізілген шектеу шараларына қарамастан мемлекеттік комиссия құрылысты аяқтауға қажетті Қытайдан жоғары білікті мамандардың елге келуіне рұқсат берді» деді холдингтің баспасөз қызметі.

Еске салсақ, бастапқы жоспар бойынша қаңылтыр шыны зауыты сонау 2017 жылы іске қосылуы тиіс болатын.

Зауыт құрылысына 300 адам жұмылдырылған. Болашақ зауытта 226 жұмыс орны пайда болады.

Жобаның Қазақстан үшін құны 43,7 млрд теңгені құрайды, оның 33,6 миллиарды «Бәйтерек» холдингінің – Қазақстанның Даму банкінен алынған қарыз.

Зауыттың түпкілікті іске қосылуы 2022 жылдың наурыз айына жоспарланған, ал өнімнің алғашқы коммерциялық шығарылымы 2022 жылдың сәуір айының басына жоспарланған.