20 жылға сотталған Дикий Арманның адвокаттары үкімге шағымданғалы жатыр

Бүгін, 14 қазан күні Алматыда Қаңтар оқиғасындағы тәртіпсіздіктерге қатысып, сотталғандардың апелляциялық соты басталды. Бұл ақпаратты Orda.kz тілшісіне Арман Жұмагелдиевтің мүддесін қорғайтын адвокат Олег Чернов растады.

Қылмыстық топқа үкім қаңтар айында шығарылған еді. Арман Жұмагелдиев 20 жылға бас бостандығынан айырылды. Осы іс бойынша 40-тан астам қатысушы тергелді. Сонымен қатар, экс-депутат Қайрат Құдайберген сегіз жылға сотталды. ҰҚК-ның 5-ші департаментінің бұрынғы басшысы Руслан Ысқақов 15 жылға сотталды. Сотталғандардың барлығы жаппай тәртіпсіздіктерді ұйымдастырғаны және наразылыққа қатысқаны үшін, адам ұрлап, қаруды заңсыз сақтағаны үшін кінәлі деп танылды.

Үкімнен кейін көп ұзамай Арман Жұмагелдиев түрмеде өзінің тамырын кеспек болды. Оның адвокаттары Арман бұл істі наразылық ретінде жасағанын айтты.

Orda.kz тілшілері осы істің барысын қадағалайтын болады. 

Айта кетейік, 8 тамыз күні Дикий Арманның анасы дүниеден озды.