20 жастағы қыздың өліміне кінәлі гинеколог ақталып шықты

Ақтөбеде 20 жастағы науқас Гүлдана Нұрмағанбетованың өліміне айыпталған гинекологқа үкім шығарылды, деп хабарлады Orda.kz. КТК телеарнасына сілтеме жасап.

Қайғылы оқиға 2019 жылдың күзінде болды. Жас ерлі-зайыптылар ата-ана бақытын сезіне алмай, жеке клиникаға көмек сұрап барған.

Гүлдананың дәрігері гинекологияда кеңінен қолданылатын жатыр түтіктерін гидротубациялау процедурасын тағайындады. Тергеу нәтижелері бойынша дәрігер науқасқа метронидазол препаратының тым көп мөлшерін енгізген. Нәтижесінде Гүлдана анафилактикалық шоктан көз жұмған.

Прокуратура дәрігерді 2,5 жылға бас бостандығынан айыруды сұрады. Дәрігердің өзі кінәсін мойындамады. Судья гинекологтың жас келіншектің өліміне ешқандай қатысы жоқ екенін ескеріп, ақтау үкімін шығарды.

– Метронидазолды қолдану салдарынан анафилактикалық шок болды деген факт дәлелденбеген. Сот үкімімен гинеколог кінәсіз деп танылып, қылмыс құрамы болмағандықтан ақталып шықты, - деді Ақтөбе қаласының №2 сотының баспасөз қызметі.

Жеке қаулы облыс прокурорына, полиция департаментінің бастығына және облыстық денсаулық сақтау басқармасының бастығына берілді. Сот актілері заңды күшіне енген жоқ.