19 шетелдік компания Қазақстанда өз жұмысын бастады

Үкіметтің кеңейтілген отырысында ҚР премьер-министрі Әлихан Смайылов Қазақстанға шетелдік капитал тарту жөніндегі жұмыс туралы баяндады.

Үкімет басшысының сөзінше, алдағы 7 жылда кемінде $150 млрд тікелей шетелдік инвестиция тарту жұмыстары жүргізіліп жатыр.

I жартыжылдықтың қорытындысы бойынша $14,5 млрд тікелей инвестиция тартылды, бұл өткен жылдың сәйкес кезеңімен салыстырғанда 28%-ға артық.

– 131 мың жаңа жұмыс орнын құруды көздейтін 30 трлн теңгеге 850 инвестициялық жобаның жалпыұлттық пулымен жұмыс жүргізілуде. Осы жылдың қорытындысы бойынша 18,5 мың жұмыс орнын құра отырып, 2 трлн теңгеге 190 жоба пайдалануға беріледі, – деді ол.

Сондай-ақ Смайылов Қазақстанға бірқатар шетелдік кәсіпорынды көшіру бойынша жұмыстар жүргізіліп жатқанын айтты. Қазіргі уақытта 19 компания көшірілген, ал басқалары бойынша бұл мәселе пысықталып жатыр.