19 млн теңге айыппұл мен жаза: Қыз алып қашқандар қалай жазаланады?

Қазақстанда некеге мәжбүрлеу және алып қашу ісі үшін жазаны қатайтып жатыр. Қылмыстық, қылмыстық-атқару және қылмыстық-процессуалдық кодекстерді оңтайландыруға бағытталған заң жобасына «некеге мәжбүрлеу» ұғымы енгізіледі, деп хабарлайды Orda.kz.

Бұл туралы мәжіліс дәлізінде депутат Абзал Құспан айтып берді.

Не өзгереді:

Бап атауы мен мазмұны өзгереді. Енді «қыз алып қашу» емес, «адамды некеге мәжбүрлеу» деп аталады. Жәбірленуші ретінде тек әйел емес, ер адам да танылуы мүмкін.

«Мәжбүрлеу тек күш қолдану арқылы ғана емес. Мысалы, бопсалау немесе жеке деректерді жариялаймын деп қорқыту арқылы да жүзеге асуы мүмкін. Сондықтан бұл бап жан-жақты мәселелерді қамтиды,» — деп түсіндірді Құспан.

Жаңа бап бойынша жауапкершілік:

• Егер күш қолданылса, жәбірленуші кәмелетке толмаған болса немесе әрекет топтасып (соның ішінде туыстар да бар) жасалса — 5000 АЕК-ке дейін айыппұл (шамамен 19 млн теңге), не бостандығын шектеу, не 3 жылдан 7 жылға дейін бас бостандығынан айыру жазасы көзделген;
• Егер бұл әрекеттер жәбірленушінің өліміне әкеп соқса — 5 жылдан 10 жылға дейін бас бостандығынан айыру жазасы қолданылады;
• Бопсалап немесе қорқытқаны үшін — 2000 АЕК-ке дейін айыппұл (шамамен 7,6 млн теңге), не түзету жұмыстары, не бостандығын шектеу, не 2 жылға дейін бас бостандығынан айыру жазасы қарастырылған. 

Сонымен қатар, жаңа заң бұрынғы жеңілдікті алып тастайды. Бұрын егер ұры құрбанды өз еркімен босатса, жазадан құтылатын. Енді бұл норма заңнан алынып тасталды.

Еске сала кетейік, Алматы облысында қыз алып қашқандар жол апатына ұшырап, қалыңдық көз жұмды.