18 жастағы қақпашы Шерхан Қалмұрзаны «Спортинг» жанкүйерлері қошеметтеді

Алматының «Қайрат» клубы УЕФА Чемпиондар лигасы аясында Португалияның әйгілі «Спортинг» командасымен кездесті. Есеп 4:1 болғанына қарамастан, жас қақпашы Шерхан Қалмұрза португалиялық жанкүйерлердің қошеметіне бөленді, деп хабарлайды Orda.kz.

Бірінші таймда алматылықтардың қақпасына пенальти тағайындалды. 18 жастағы қақпашы Шерхан Қалмұрза соққыны қайтарып үлгерді. Ол командасын барынша қорғауға тырысты. Дегенмен тайм соңына қарай «Спортинг» есеп ашты.

«Қайрат» футболшылары 86-шы минутта бір гол соқты. Алайда кездесу 4:1 есебімен Португалия клубының жеңісімен аяқталды.

Ойын біткен соң алаңнан кетіп бара жатқан Шерхан Қалмұрзаға «Спортинг» жанкүйерлері қол шапалақтады. Олар жас қақпашыны ерекше құрметпен қарсы алды.

Айта кетейік, Алматыда өткен Премьер-лиганың 23-турындағы ең маңызды кездесулердің бірі – «Қайрат» пен «Ақтөбе» арасындағы матчта қақпашы Темірлан Анарбеков жарақат алды.