17 жігіт оқушы қызды зорлаған: Ішкі істер министрі оқиғаға қатысты пікір білдірді

Ішкі істер министрі Ерлан Тұрғымбаев он жеті ер адам зорлады деп хабарланған сарыағаштық оқушы қыздың ісіне қатысты пікір білдірді.

Бұл туралы Orda.kz хабарлайды.

– Оны 17 адам зорлағанына сенімдісіздер ме? Қыз жоғалып кетті, бір күн үйінде болған жоқ. Іздестіру кезінде табылып, анасына қайтарылды. Сол күні ешқандай арыз да болған жоқ. Бір тәуліктен соң, «оны 17 жігіт зорлаған» деген арыз түсті. Содан кейін қыздың анасы арыздан бас тартты. Тек бірнеше күннен кейін әлеуметтік желілерде «оқушы қызды 17 ер адам зорлады» деген мәлімдеме пайда болды, - деді Тұрғымбаев журналистердің сұрақтарына жауап бере отырып.

Министр осы оқиғаға қатысты қандай шешім қабылданатынын да айтты.

– Тексеруге міндеттіміз және жәбірленушіге қатысты бірқатар медициналық тексерулер жүргізілуде. Осы тексерудің қорытындысы бойынша шешім қабылданады, - деді ол.

Еске салайық, Түркістан облысында кәмелетке толмаған қызды 17 адамның зорлағаны хабарланған еді. Жан түршігерлік оқиға осы жылдың маусым айында болған, бірақ баспасөз беттерінде жақын арада жария болды.