160 млн теңге ұрлаған астық қоймаларының басшысы сотталды

«Астық қоймалары» директорына қатысты сот үкімі шықты. Бұл үкім 160 млн теңгенің астық ұрлығы мен 118 млн теңге шығынға әкелген салғырттық қылмысқа қатысты.

Бұл туралы сыбайлас жемқорлыққа қарсы іс қимыл агенттігі хабарлады.

Астанада осы атышулы іс бойынша сот үкімі шықты. «Астық қоймалары» ЖШС өкілдіктерінің бұрынғы директоры Марат Жүсіпов мемлекеттiк астық қорынан 160 миллион теңгеден астам сомада астық ұрлады деп және 118 миллион теңгеден астам сомадағы 996 тонна астықтың бүлінуіне себеп болған салғырттығы үшін кінәлі деп танылды.

Астана қаласының қылмыстық істер жөніндегі ауданаралық соты Жүсіповке 8 жыл 5 ай мерзімге бас бостандығынан айыру жазасын тағайындап, мүлкін тәркілеу туралы үкім шығарды. Сонымен қатар, оған мемлекеттік қызметте және квазимемлекеттік секторда лауазымды қызметтерді атқаруға тыйым салынды.

Үкім әлі заңды күшіне енген жоқ.