«160 адам із-түзсіз жоғалды»: Жойқын зілзала құрбандары 3600-ге жетті

Мьянмада болған жойқын зілзала салдарынан қаза тапқандар саны 3600-ге жетті, деп хабарлайды Orda.kz.

28 наурызда Мьянмада 7,7 балдық жер сілкінісі тіркелді. Апат елдің тұтас аймақтарын қиратып, көршілес Таиландқа да әсер етті. Жер сілкінісі Бангладеш, Үндістан, Лаос, Қытай сияқты бірнеше елде сезілген.

Зілзаладан тұрғын үйлер мен ғимараттар қирап, 3600 адам қаза тапты, 5017 адам жарақат алды. Тағы 160 адам із-түзсіз жоғалғандар қатарында.

Ресми мәліметке сәйкес, бүгінге дейін 89 афтершок тіркелген. Олардың қуаты 2,8-ден 7,5 балға дейін жеткен. Қирандылар астында қалғандарды іздеу-құтқару жұмыстары жалғасып жатыр.

Айта кетейік, президент Қасым-Жомарт Тоқаев Мьянмадағы зілзала салдарынан көп адамның қаза болғаны туралы хабарды терең күйзеліспен қабылдап, премьер-министр Мин Аун Хлайнға және қаза тапқандардың жақындарына көңіл айтты.