Бүгін 16 желтоқсан. Қазақстанның түкпір-түкпірінде тәуелсіздіктің 30 жылдығы мерекесі тойланып жатыр. Осы уақытта «Демократиялық партия» бастамашыл тобы Желтоқсан және Жаңаөзен құрбандарын еске алу үшін Тәуелсіздік монументіне келді.

Сағат 12:00. Наурызбай батыр мен Сәтбаев, Желтоқсан көшелері жабық. Бұл жерде 50-60 адам жиналып тұр. Қатарында Жанболат Мамай бастаған Демократиялық партия белсенділері және желтоқсаншылар бар.

16 желтоқсан: Алматы қаласындағы митинг
Фото: Orda.kz

– Бүгін Қазақстанда қаралы күн деп айтуға болады. Осыдан 10 жыл бұрын бейбіт жүрген Жаңаөзеннің мұнайшыларын қырып салды. Назарбаевтың полициялары оларды қуалап жүріп, оқ жаудырды. Қанша отбасының шаңырағы ортасына түсті. Тәуелсіз Қазақстандағы ең қасіретті оқиға Жағаөзен қырғыны екенін білеміз. Оны ұйымдастырғандарды кешірмейміз. Сол кездегі қырғынға жауапты адам – сол уақыттағы Ішкі істер минситрі Қалмұханбет Қасымов. Өйткені, оның «Жаңаөзеннің қасапшысы» деген атағы бар. Біздің ойымызша, Жаңаөзен қырғынына жауапты адамдар сотқа тартылуы керек. Сол кездегі Маңғыстау облысының әкімі болған Қырымбек Көшербаевтан бастап, тәртіп сақшылары жауапқа тартылуы тиіс. Бұл той тойлайтын, қуанатын күн емес. Қазір біз боздақтарға құран оқып, Тәуелсіздік монументіне барамыз. Билік бізден қорқып, бәрін жауып тастаған, – дейді «Демократиялық партия» құру жөніндегі бастамашыл топтың жетекшісі, саясаткер Жанболат Мамай.

Жиналғандардың қолдарында плакаттар бар. Кейбірінде «Жаңаөзен – 2011», «Желтоқсан – 1986» деп жазылған. Жанболат Мамай «бүгінгі күнді қан төгілген күн ретінде еске аламыз» деді. Жанболат Мамай және оның 45-ке жуық жақтастары Мира көшесіндегі ескерткіш маңында Жаңаөзен оқиғасы туралы плакаттар ілді.

16 желтоқсан: Алматы қаласындағы митинг
Фото: Orda.kz

Сағат 12:20. Жиналғандар «Жаңаөзен – Желтоқсан! Шал кет» деп ұрандатты. Сондай-ақ, Жаңаөзен туралы бар шындықты айтайық деп айғайлады. Бата кезінде Арон Атабек туралы да айтылды.

16 желтоқсан: Алматы қаласындағы митинг
Фото: Orda.kz

Сағат 13:05. Жиналғандар Тәуелсіздік монументінің алдына келді. Плакат ұстап, шерулетіп келе жатқандар «Назарбаев кет» деп айқайлап жатыр.

Адамдар монумент алдына тұрып кезек-кезек дыбыс ұлғайтқышпен сөйлеп жатыр.

– Бүгін келген адамдардың үрейі ұшты. Алматының орталығын жауып тастау Қазақстан сияқты авторитарлы мемлекетте ғана болатын масқара жұмыс. Егер биліктің демократиялық жолмен келгені рас болса, мұндай бейберекеттікке жол бермес еді. Олардың сенетіні күштік құрылымдар. Әділетті сайлау өтсін. Әділетті сайлауда «Нұр отанның» жеңетін бір де бір мүмкіндігі жоқ. Әбден шегіне жетті. Ақшаны офшорға аударып, байлықты тонап бітті, – деді Жанболат Мамай.  

Сағат 13:17. Сәтбаев-Фурманов, Тимирязев-Абай көшелері аумағында жол қозғалысы шектелді. Мобильді интернет толығымен бұғатталды.

16 желтоқсан: Алматы қаласындағы митинг
Фото: Orda.kz

Сағат 13:30. Мешіт қызметкері келіп құран оқыды. Соңында белсенді Жанболат Мамай сөз сөйледі. Құран бағышталған соң, алаңға жиналғандар тарқады.

Алаңнан ақпарат таратқандар: Бек Байтас, Асан Анарбай.

Бөлісіңіз: