16 жасқа толмаған балаларға итті серуендетуге тыйым салынуы мүмкін

Мәжіліс депутаттары заң жобасына жануарларға жауапкершілікпен қарау мәселелері бойынша түзетулер енгізді. Атап айтқанда, 16 жасқа дейінгі балаларға серуендетуге тыйым салынатын ит тұқымдарының тізімін анықтау жоспарлануда.

Екінші оқылымдағы заң жобасымен жұмыс барысында депутаттар түзетулер енгізді:

• жеке жануарларға арналған баспаналарды әкімдіктердің қоса қаржыландыруы;
• 16 жасқа толмаған адамдар үшін ерекше жауапкершілікті талап ететін үй жануарларын серуендетуге тыйым салуды енгізу;
• үй жануарлары иелерінің оларды күтіп-баптау кезінде санитарлық нормаларды сақтау жауапкершілігін және әкімдіктердің үй жануарларын ұстау ережелерін әзірлеуді енгізу;
• мемлекеттік бюджет қаражаты, сондай-ақ Қазақстан Республикасының заңнамасында тыйым салынбаған өзге де көздер есебінен қаңғыбас жануарларды вакциналау және зарарсыздандыру;
• ветеринариялық қызметтер мен әкімдіктердің есепке алынған үй жануарлары туралы ақпаратты ұсыну мерзімдерін реттеу.

Бұл туралы депутат Александр Милютин Мәжіліс отырысында мәлімдеді. Қазақстанда иесінің ерекше жауапкершілігін талап ететін жануарларға мыналар жатады:

• американдық питбуль;
• Американдық стаффордшир;
• ротвейлер.

Мәжіліс депутаттары жануарларға жауапкершілікпен қарау туралы заң жобасын екінші оқылымда мақұлдады.