159 миллион теңге айыппұл салынса да елордалық нысандар талаптарды бұзуда

Қала билігі тұрғындар мен қонақтарды, сонымен қатар  кәсіпкерлік нысандарды санитарлық нормаларды және карантин режимі талаптарын қатаң сақтауға шақырды.

Нұр-Сұлтанда жыл басынан бері карантин бұзған 786 жеке және заңды тұлға 159 миллион теңгеге әкімшілік жауапкершілікке тартылды. Бұл туралы Orda.kz. әкімдіктің ресми сайтына сілтеме жасап хабарлады.

Әкімдік сайтының хабарлауынша, елорданың мониторингтік топтары карантин тәртібін бұзған кәсіпкерлік нысандарды анықтауды жалғастыруда, жұмыс тәулік бойы күшейтілген режимде жүргізіліп отыр.

Көптеген өтініш-ескертулерге және әкімшілік жауапкершілікке тартылатынына қарамастан кейбір мекемелер жұмыс режимін сақтау жөніндегі талаптарды әлі күнге дейін елемейді. Көпшілік арасында бұқаралық іс-шаралар өткізеді, ал қызметкерлері бетперде тақпайды.

Оған мысал - 16 шілдеде елордада карантин шектеулерін бұзған 8 кәсіпкерлік нысаны анықталған.

Сарыарқа ауданында белгіленген уақыттан кейін «Pei Zdes» лаундж-бары, «Атом» компьютерлік клубы және «Угол 4/1» бары жұмыс істеді.

Алматы ауданында орналасқан «Киш Миш» кафесінде, «Какие люди» барында, «Эхо» клубында да жұмыс режимі бұзылған.

Есіл ауданындағы «Inforno» мейрамханасы мен «VZлетный» ресто-бары сағат 22.00-ден кейін келушілерді қабылдаған. Ал «VZлетный» тіпті кальян шегу қызметіне жол берген.

Тәртіп бұзушыларға қатысты жиналған материалдар тиісті шаралар қабылдау үшін аудандық санитарлық-эпидемиологиялық бақылау басқармасына тапсырылды.

Жыл басынан бері елордада шектеу және карантин шараларын бұзғаны үшін жалпы сомасы 159 миллион теңгеге 786 жеке және заңды тұлға әкімшілік жауапкершілікке тартылды.