«15 жасар қызды зорлау»: Атырауда жазадан құтылып кетпек болған зорлықшы сотталды

Жазадан жалтарып кеткен Атыраудағы 15 жастағы қызды зорлаған жас жігіт сотталды. 

Бұл туралы заңгер Ләззат Рақышева өзінің instagram парақшасында хабарлады.

Бұған дейін қыз зорлаған күдіктінің үстінен қозғалған қылмыстық іс тоқтап қалған. Өйткені қос тараптың ата-анасы өзара татуласып, құда-жекжат болуға келіскенін «КТК» арнасы хабарлаған болатын. Бұл оқиға жайлы телеарна бағдарлама түсірді.

Құда болайық дегеннен кейін, жәбірленушінің анасы полицияға жазған арызын қайтарып алыпты. Осыдан кейін қылмыстық іс жабылған.

Алайда кейін анасы қызына күн көрсетпей жатқанын айтып шағымданды.

«Енді ешқандай жазаға тартылмайтынын білген жігіт жақ қызыма күн көрсетпей, үйден қуып жіберді», — деді жәбірленушінің анасы.

Оқиғадан кейін анасы құзырлы органдардан қылмыстық істі қайта қарауын сұраған болатын.

15 жастағы қыз әлеуметтік желі арқылы танысқан жігітпен жолықты. Анасының сөзінше, айыпты қызды көлігіне отырғызып айдалаға апарып зорлапты. Мектеп оқитын қыз бұл оқиғаны ешкімге айтпаған. Анасы қызының денесіндегі көгерген іздерін көргенде ғана біліпті. Дереу құзырлы органдарға арыз жазыпты.

Қылмыстық іс қозғалып, тергеу басталғанда, зорлаған жігіттің туыстары кешірім сұрап келіпті. Тіпті «Балалардың болашағына балта шаппайық, екі жасты қосайық» деп соңғы сөзін айтқан. Алайда қызға күн көрсетпей, ұрып-соққан. Қыз ауруханадан бір-ақ шықты.

Айыпты жігіт 2 жыл 6 айға сотталды. Заңгер Ләззат Рақышева денсаулыққа зиян келтіргені үшін тағы басқа баппен соттау керек еді деп отыр.