1,5 миллиард теңге салық төлемеген ақтөбелік кәсіпкер төрт жылға бас бостандығынан айырылды

Кәсіпорын директоры кінәсін мойындамайды. Үкім әлі заңды күшіне енген жоқ. Сот ірі көлемде салық төлемеген ақтөбелік кәсіпкерді төрт жылға бас бостандығынан айырды, деп хабарлайды «Диапазон» басылымы.

Экономикалық тергеу департаменті «АқтөбеЭлектросетьстрой» ЖШС директоры Болат Күшкеновті 2015-2017 жылдар аралығында 1,5 миллиард теңгеге жуық салықты төлемеген деп айыптады. Іс материалдарынан анықталғандай, жауапкер кірістер мен шығыстар туралы декларацияға бұрмаланған мәліметтерді енгізген, шот-фактураларды нақты жұмыс орындамай пайдаланған.

Басылым сотталушының өзі кінәсін мойындамағанын атап өтеді. Күшкенов мемлекеттік сатып алумен жұмыс істегенін, қосалқы мердігерлердің қызметіне жүгінгенін, жалған шот-фактураларды пайдаланбағанын айтты. Айтуынша, ол барлық жұмыстарды атқарған, тауарды жеткізген. Кейін олар іске қосылған нысандардың құрылысында пайдаланылған. Ол соттан адвокаттың барлық уәждерін тексеруді сұрады.

Бірақ сот ЖШС басшысы салықты төлемегені үшін кінәлі деп шешті. Сот Болат Күшкеновті төрт жылға бас бостандығынан айырды. Сот үкімі жарияланған соң ол бірден қамауға алынды. Сонымен қатар, сот сотталушыны мемлекетке төленбеген салық сомасына тең – 1 миллиард 491 миллион теңге шығынды өтеуге міндеттеді.

Үкім заңды күшіне енген жоқ.