15 айға созылған Израиль мен ХАМАС арасындағы қанды соғыс бітуге таяу

Газа секторында атысты тоқтату туралы келісімге қол жеткізілді, деп хабарлайды Orda.kz.

Соңғы сағаттарда әлемдік БАҚ ресми мәлімдеме жақын арада жасалады деп жарысып жазуда.  ХАМАС өкілдері Al Jazeera арнасына Израильден арадағы хабар жеткізуші ададмдар арқылы алынған атысты тоқтату туралы ұсынысты мақұлдағандарын хабарлады.

Палестиналық топтың мәліметінше, Халил әл-Хайя бастаған делегация атысты тоқтату және израильдік тұтқындарды Қатар мен Египеттегі делдалдарға тапсыру жөніндегі келісімді қолдаған. Дегенмен, ұйымның ресми мәлімдемесінде бұл ұсынысқа қатысты шешім Египет пен Қатарға берілгені айтылғанымен, нақты қандай шешім қабылданғаны көрсетілмеген.  

АҚШ Мемлекеттік хатшысы Энтони Блинкен Газа секторында атысты тоқтату туралы келісімнің «жақын» екенін айтты.

 «Бұл жақын сағаттарда болуы мүмкін және болуы керек», — деді Блинкен CNN арнасына берген сұхбатында.

Палестина әкімшілігі тұрғындарды келісім егжей-тегжейі анықталғанға дейін Газадағы израильдік әскерлер орналасқан аудандардан аулақ болуға шақырды.