132 мың қазақстандық өз-өзіне құмар ойын ойнауға тыйым салды

132 мың адам eGov mobile арқылы құмар ойындар мен бәс тігуге қатысуға  өз-өзіне шектеу қызметін пайдаланды. 

Бұл туралы туризм және спорт министрлігі хабарлады.

Бұл қызмет іске қосылғанға дейін тізімде 3000-нан сәл астам адам болған.

Министрлік 18 наурыздан бастап азаматтарға құмар ойындарға қатысуын алты айдан бір жылға дейін өз бетінше шектеуге мүмкіндік беретін онлайн сервис пилоттық режимде жұмыс істеп жатқанын еске салды. Шектеу лицензиясы бар заңды ойын компанияларына ғана қатысты.

«Өзін-өзі шектеу заңсыз онлайн казинолар мен букмекерлік кеңселерге қолданылмайды» деп ескертті министрлік.

Қызметті қосу үшін телефоныңызда eGov мобильді қосымшасы, электрондық цифрлық қолтаңбаңыз болуы керек. Берілген өтінішті кері қайтарып алу құқығы қарастырылмаған. Керісінше, өзін-өзі шектеуді ұзартуға болады.