13 жастағы жасөспірім кісі өліміне куәгер болды

Өскемен-Алматы пойызында 74 жастағы зейнеткер қайтыс болды.

Бұл туралы полиция департаментінің баспасөз қызметі хабарлады.

Қайғылы оқиғаны жолаушылардың бірі әлеуметтік желіде жариялады. Айтуынша, пойызда өте ыстық болған.

«Атасы әйелімен бірге тамбурға шығып, ауа жетпей құлап, қайтыс болды. Мұның бәрі 13 жасар немересінің көз алдында болды. Кондукторларда алғашқы медициналық көмек көрсету қобдишасы болмаған. Сарыөзек стансасына жеткен жедел жәрдем мәйітті көрпемен алып кетті. Зембіл болған жоқ», - деп бөлісті жолаушы.

Полиция департаменті ер адамның өліміне қатысты тергеуді бастады.

«Қонаев стансасындағы жергілік полиция бөлімі Өскемен-Алматы бағытындағы жолаушылар пойызында кенеттен қайтыс болу оқиғасы бойынша сотқа дейінгі тергеу амалдарын бастады. Тергеу жүргізілуде» деп жауап берді департаменттің баспасөз қызметі.

«Жолаушылар тасымалы» АҚ Сарыөзек станциясында №351 Өскемен-Алматы пойызының бастығы денсаулығының күрт нашарлауына байланысты 74 жастағы жолаушыға жедел жәрдем шақырғанын хабарлады.

«Пойыз жолсеріктері жолаушылармен және медицина қызметкерлерімен бірге алғашқы медициналық көмек көрсету үшін барлық шараларды қабылдады. Өкінішке қарай, жедел жәрдем бригадасы жолаушының қайтыс болғанын хабарлады. Жолаушы жолсерікке денсаулығының нашарлағанына шағымданбаған. Жолаушы әйелімен бірге Жалғыз-төбе станциясынан Алматыға бет алған. Әйелінің айтуынша, ер адам демікпемен ауырады. Ұлттық тасымалдаушы жолаушының отбасына көңіл айтады» делінген ҚТЖ хабарламасында.