13 жасар шахматшы Халықаралық шебер атағын иеленді

Дүниежүзілік шахмат олимпиадасының чемпионы атағын алған қазақстандық шахматшыға итальяндықтар тәнті болды.

Бұл туралы «Астана» орталық шахмат клубы хабарлады.

Сауат 5 жасынан шахмат ойнап, 16 жасқа дейінгі дүниежүзілік шахмат олимпиадасының чемпионы атағын алды.

«Жуырда ғана жас шахмат шебері Сардиниядағы беделді жарыста голландиялық гроссмейстер Джорден Ван Форестті жеңгеннен кейін бірден танымал болды. Дарынды балаға итальяндықтар қызығушылық танытып, оны шахмат фестивалінің құрметті қонағы болуға және Римдегі шеберлер турниріне қатысуға шақырды. Көрермендер қазақстандықты өте жылы қарсы алды, сапарға кететін барлық шығынды ұйымдастырушылар өз мойнына алды! Жарыс нәтижесінде Сауат классикадан құрметті 3-орын үшін Кубокты үйіне әкеліп, блиц бойынша 1-2 орындарды бөлісті. Сауат 5 жасынан шахмат ойнап, 16 жасқа дейінгі Бүкіләлемдік шахмат олимпиадасының чемпионы атағын иеленгенін білесіздер», деп хабарлайды «Астана» орталық шахмат клубы.

Бұл атаққа жету үшін үш халықаралық шеберлік стандартын орындау және халықаралық ELO 2400 рейтингінен өту керек болды. Сауат Испанияда, Польшада және Қазақстанда өткен турнирлерде 5 рет халықаралық шеберлік сертификатын алды.