13 ақпаннан бастап жүргізуші куәлігі мен құжаттарсыз жүруге болады

Жол қозғалысы мәселелері бойынша түзетулер күшіне енгеннен кейін жүргізушінің құжаттары ақпараттық жүйе арқылы тексеріледі.

Жол қозғалысы мәселелері бойынша Қазақстан Республикасының кейбір заңнамалық актілеріне Президент қол қойған түзетулер 2021 жылғы 13 ақпанда күшіне енеді, деді ішкі істер министрі Ерлан Тұрғымбаев.

Осы күннен бастап жүргізушілердің құжаттары ақпараттық жүйелер арқылы тексерілетін болады, бұл жүргізушілерге қағаз нұсқаларын өздерімен бірге алып жүрмеуге мүмкіндік береді.

Бұрын Қазақстанда жүргізуші құжаттарының біреуі болмағаны үшін ескерту (бірінші рет болса) немесе 5 АЕК айыппұл салынған. Енді көлікті басқарған кезде жүргізушілер жанында тек бір құжат болуы керек - жеке басын куәландыратын құжат. Қазақстанда берілген жүргізуші куәлігі, тіркеу куәлігі, сақтандыру полисі, сондай-ақ техникалық байқаудан өткенін растайтын құжат, полиция қызметкері планшет арқылы тексереді. Интернетке қосылмаған елді мекендер мен автомобиль жолдарында тексеру радиобайланыс арналары арқылы жүзеге асырылады.

«Жүргізушілердің жүргізу құжаттарын алып жүру және ұсыну міндеттерін жою - бұл қазіргі заманғы технологиялық полицияның дамуына жасалған тағы бір қадам. Мемлекет көлік басқаруды едәуір жеңілдетті, бірақ жүргізушілер басқа көліктердің қауіпсіздігі үшін өз жауапкершіліктерін ұмытпауы керек. Сондықтан, осы мүмкіндікті пайдалана отырып, мен жүргізушілерді де, жаяу жүргіншілерді де жол ережелері мен көлік жүргізу мәдениетін қатаң сақтауға шақырамын», - деп атап өтті ішкі істер министрі.

Жаңа ережелер қазақстандық жүргізуші куәлігі жоқ және Қазақстанда тіркелмеген көлік құралдарын басқаратын шетелдіктерге қатысы жоқ.