12 жыл бойы ұрып-соққан: Атырауда депутаттың бұрынғы жұбайы күйеуін соққыға жықты деп айыптады

Атырау қаласының тұрғыны, төрт баланың анасы Нұржамал Тәжіғалиева Қазақстан президентіне ашық хат жолдап, бұрынғы күйеуі – облыстық мәслихат депутаты Айбар Ерекешовті көп жылдық отбасылық зорлық-зомбылық, алимент төлеуден жалтару және мүлікке қатысты заңсыз талаптарға қатысты айыптады, деп хабарлайды Orda.kz.

12 жыл бойы таяқ жеп, үнемі қорлауға ұшырағанын айтқан Нұржамал, өзінің жан ауыртатын жағдайларын ашық баяндады. Айтуынша, 2018 жылы Айбар Ерекешов оның басын мобильді телефонмен соққан, ал 2023 жылы оған тағы да күш қолданған.

Нұржамал бірнеше рет полицияға арыз жазғанын, бірақ әрдайым күйеуі мен оның ата-анасының қысымына шыдамай, арызды қайтып алғанын айтады. Олар тек «балалар үшін түзеледі» деп уәде беретін болған. Бірақ уақыт өте келе жағдай өзгермеген.

Неке бұзылғаннан кейін бұрынғы күйеуі алиментке 6 миллион теңгеден астам қарыз болған. Депутат алимент төлеуден бас тартқаннан кейін, ол бұл мәселеге байланысты сот процесін бастап, балаларды өз тәрбиесіне алуды талап етіп жүр. Нұржамалдың айтуынша, ол жасырын түрде үлкен қызын алдап алып кеткен.

Осы оқиға елімізде отбасылық зорлық-зомбылық, алимент төлеуден жалтару және балаларды өз тәрбиесіне алу сияқты мәселелердің өзекті болып отыр.

Ал Атырау мәслихатының депутаты Айбар Ерекешов әйелінің айыптауын «жала жабу» деп мәлімдеді. Депутаттың сөзінше, оның бұрынғы әйелінің айтып отырғанының барлығы өтірік әрі жала жабу. Ол өзі әйеліне ешқашан қол көтермегенін, ал оның денесіндегі жарақаттар басқа себептерге байланысты болғанын айтты.

«Мен 2023 жылы Нұржамалмен ресми түрде ажырастым. Иә, 2018 жылы ол басынан жарақат алып, ауруханаға түсті. Бірақ мұның қалай болғанын нақтылау қажет. Ол үйге мас болып келіп, тайып құлады. Кейінірек ол жол апатына ұшырап, жарақат алды. Ол кезде біз бірге болмадық», – деді Ерекешов. 

Сондай-ақ ол зорлық-зомбылық туралы айтқанын да жоққа шығарды.

«Мен оған ешқашан қол көтерген емеспін. Қате түсінуге болатын жалғыз жағдай – мен ол үлкен қызыммен дауласқан кезінде араласқаным болды. Бірақ мен мұны дәлел ретінде қолданғым келмейді», – деді депутат. 

Ажырасу мен мүлікті бөлісу жайында

Ерекешов ажырасу Нұржамалдың бастамасымен болғанын айтты.

«Омыраудағы баласын тастап, ол Еуропада 1 айға жуық уақыт болды. Мен ажырасуға арыз бердім. Оның талабымен мен оған екі пәтер мен көлік бердім. Содан кейін алимент қажет емес екенін айтты», – деді ол. 

Бірақ 2024 жылдың желтоқсан айында оқиға басқаша өрбіді.

«Ол өз ойын өзгертіп, алимент талап етті. Сот орындаушысы есеп айырысу жүргізді және мен төлемдерді қаңтар айынан бастайтынымды айттым. Мен ешқашан өз міндеттерімнен жалтарған емеспін», – деді Ерекешов. 

Балаларымен болған жағдайы туралы

Депутаттың айтуынша, балалар өз анасымен қалды. Бірақ олармен ешқашан байланысын үзбепті. 2024 жылдың қараша айында Ерекешовтің әйелі балаларын тағы да тастап, Алматыға кетіп қалған.

«Ол төрт баланы 17 жасар қызға қалдырды. Осыдан кейін менің үлкен қызым анасына оралудан үзілді-кесілді бас тартты. Біздің екінші баламыз мүгедек және ерекше күтімді қажет етеді» , — деді ол. 

Оның лауазымына қойылатын талаптар туралы

Айбар бұрынғы жұбайының: «мұндай адам депутат болуға лайықты емес» дегеніне қарсы пікір білдірді.

«Егер мен оған шынымен қол көтерсем немесе қандай да бір заңсыз әрекеттер жасасам, полиция шақыртулары мен хаттамалар болар еді. Бірақ мұндай жағдай болған емес. Мұны тексеру оңай», – деді Айбар. 

Әділдікке шақыру

Депутат өзінің мақсаты тұрақтылықты сақтау және балалардың әл-ауқатын қамтамасыз ету екенін атап өтті.

«Мен ажырасу мен балалардың айналасындағы дау-дамай күрделі процесс екенін түсінемін. Бірақ мен ешқашан заң бұзған емеспін және өз атым мен беделімді қорғауға дайынмын», - деп қорытындылады Ерекешов.