12 жасар қызды зорлап, видеоға түсірген: Тараз тұрғыны Тоқаевтан көмек сұрап отыр

Orda.kz редакциясына топтық зорлаудың құрбаны болған 12 жасар қыздың анасы жүгініп отыр. Оның айтуы бойынша,  күдікті болып отырған үш жасөспірім әлі күнге дейін бостандықта жүр.

Әйелдің айтуынша, көрші жасөспірімдер қызын бірнеше рет зорлап, бәрін видеоға түсірген. Бұл туралы білген жәбірленуші қыздың анасы полицияға арыз жазды.

«Бесінші маусымда  полицияға қызымды көршілерім зорлағаны жайлы хабарладым. Күдіктілер қызымнан үлкен жігіттер. Мен өзім және қызым үшін қорқамын, үнемі қорқынышпен өмір сүреміз»,
 дейді Тараз тұрғыны.

Күдіктілер 14 жастан 16 жасқа дейінгі жасөспірімдер. Жәбірленушінің отбасы барлық дәлелдемелерге қарамастан тергеу кешіктірілгеніне наразы. Сондай-ақ, прокурор күдіктілерді тергеу изоляторына қамауға алуды өтінгенімен, әйел жасөспірімдердің үй қамағында болғанына ашулы.  Алайда сот мұндай шараны артық деп тапты.

«Жеті ай өтті, бірақ іс сотқа әлі жеткен жоқ. Полиция күтіңіз дейді. Қолымызда сараптамалар, дәлелдер, тіпті бейнежазбалар бар, бірақ күдіктілер әлі қамауға алынбаған. Президенттен бізді қауіпсіздігімізді қорғауды сұраймын»,
 деп Тараз қаласының тұрғыны көмек сұрады.

Жәбірленушінің мүдделерін қорғау үшін адвокат тергеу аяқталғанда ғана қабылданды. Бастапқыда берілген мемлекеттік заңгерге әйел сенбеді.

«Тергеуші тергеу аяқталғаны жайлы хабарлады. Қазір іс танысу сатысында. Осыдан кейін ол прокуратураға ҚР Қылмыстық іс жүргізу кодексінің 300-бабының талаптарын зерделеу үшін беріледі»,
 деп адвокат Әлия Арзымбетова жағдайға түсініктеме берді.

Полицияның хабарлауынша, бұл іс ҚК 120-бабының 4-бөлігі бойынша «Бір топ адамның жас балаға қатысты жасаған зорлығы» ауыр қылмыс болып есептеледі және өмір бойына бас бостандығынан айыруды көздейді.

Сонымен қатар, зардап шеккен қызбен психолог-мамандар әңгімелесті. Жәбір көрген қыздың анасы іс жақын арада сотқа жетіп, кінәлілер жазаланатына үміттенеді.