12 маусымнан бастап Италияға тікелей рейстер ашылады

Милан – Алматы – Милан бағыты бойынша  аптасына екі рейс қатынайды.

Қазақстанның Азаматтық авиация комитеті мен Италияның авиациялық билік органдары арасындағы қолданыстағы келісімдер аясында екі ел арасында тікелей тұрақты рейстерді жүзеге асыру үшін құқықтық база құрылды.

Бұл туралы ҚР Индустрия және инфрақұрылымдық даму министрлігінің баспасөз қызметі хабарлады.

Азаматтық авиация комитеті төрағасының орынбасары Салтанат Томпиева Италияның NEOS әуе компаниясының өкілдерімен кездесу барысында Алматы мен Милан арасында әуе рейсін ашу туралы келісімге қол жеткізді.

2022 жылдың 12 маусымынан бастап Милан-Алматы-Милан бағыты бойынша тұрақты жолаушылар рейсін бастау жоспарлануда. Рейстер аптасына 2 рейс – дүйсенбі және бейсенбі күндері, Boeing 737 және Boeing 787 ұшақтары арқылы жүзеге асады.

Қазақстан мен Италия өкілдері екі ел арасындағы сауда-экономикалық, инвестициялық, туристік және мәдени ынтымақтастықты дамыту үшін тікелей әуе қатынасының маңыздылығын атап өтті.

NEOS әуе компаниясы Милан Мальпенса әуежайында орналасқан. Алғашқы рейс 2002 жылы 8 наурызда Милан – Сенегал бағыты бойынша жасалған болатын.