11 жастағы кентаулық бала мал азығына ақша жинай бастады

Кентаулық 11 жасар бала қуаңшылық пен ыстықтан қырылып жатқан малға көмектесуге шақырып, әлеуметтік желіде бейнежазба жариялады.

Бұл туралы Orda.kz хабарлайды.

Shopan-atа қой өсірушілер ұлттық қауымдастығының төрағасы Алмасбек Садырбаевтың Facebook парақшасында жарияланған видеода Диас аштықтан қырылған малға көмектескісі келетінін және өзінде жиналған ақшаны беруге шешім қабылдағанын айтты.

– Диас - Азаматсың!

Диасты тәрбиелеп өсіріп жатқан ата-анасына Алғыс білдіремін!

Негізі анасы жариялау қажет емес деген еді. Мен жақсылықты жариялағанда тұрған ештеңе жоқ, өзгелер үлгі алсын деген мақсатта салып отырмын.

Өркенің өссін! 11 жасар баладан үлгі алайық, жігіттер! – деп жазды Алмасбек Садырбаев.

11 жастағы Диастың жинаған қаражаты –3125 теңге. Бұл ақшаны Диас ата-анасына берді, олар Алмасбек Садырбаевтың есепшотына аудару туралы шешім қабылдады. Диастың ата-анасы ауылшаруашылық сарапшысының парақшасын бұрыннан оқитынымен бөлісті.

– Біз қырылған малды аядық. Қатты алаңдай бастадық, немқұрайлы қарамаймыз. Маған ұлымның бастамасы қатты ұнады және біз Алмасбек Садырбаевқа көмек жібергіміз келді, - деді Диастың анасы.