«100-ден аса адам көз жұмды»: Израиль Ливанға соққы жасады

Израиль әскері 23 қыркүйекте Ливандағы «Хезболла» радикалды қозғалысы нысандарына жойқын әуе соққысын берді. Бұл Израиль мен Ливан арасындағы қақтығыс тарихындағы ең ірі шабуыл болды. Ливан дереккөздерінің мәліметінше, соққыдан 100-ден астам адам қаза тауып, 400-ден астам адам жараланған, деп хабарлайды Orda.kz.

Соққы «Хезболла» Израильдің солтүстігін зымырандармен атқылағанына жауап болды. Иранның қолдауына ие «Хезболла» Израильмен соғысып жатқан палестиналық радикалды «ХАМАС» қозғалысын да қолдайды. Израильдің қорғаныс министрі Йоав Галланттың айтуынша, солтүстік Израиль тұрғындарына төнген қауіп толық жойылмайынша, шабуылдар жалғаса береді. Израиль билігі шабуылдардың «Хезболланың» қару-жарақ қоймаларына бағытталғанын және олардың 300-ден астамын жойғанын мәлімдеді.

Жағдай шиеленісіп жатқанда Израиль әскері өткен апта соңында Бейруттың оңтүстік шетіне соққы жасады. 45 адам қаза тапты, соның ішінде 16-сы «Хезболла» сарбаздары еді. Сонымен қатар, Ливан тұрғындарына «Хезболла» нысандары шоғырланған аудандардан шығып кетуді ескерткен көптеген автоматтандырылған қоңыраулар түсіп жатыр.

Израиль шабуылы «Хезболла» мүшелерінің пейджерлері мен радиоқабылдағыштары жаппай жарылып, жүздеген жауынгерлер мен олардың отбасылары зардап шеккеннен кейін басталды. Израиль бұл операцияға  қатысы жоқ екенін ресми мәлімдеді.