«10 жыл бұрынғы уәде»: Вице-министр бастаған тубдиспансер құрылысы тұралап тұр

Вице-министр Серік Төленбергеновтің кезінде ақтөбеліктерге берген уәдесі орындалған жоқ. Аурухана құрылысы 10 жылдан бері аяқталмай тұр. Енді өңір 4,6 млрд теңгенің жобасын өзгертіп, басқа аурухана салуды ұсынып отыр, деп хабарлайды Orda.kz.

2016 жылы Ақтөбедегі Жаңақоныс тұрғын алабында туберкулезге қарсы диспансер құрылысы басталды.

«Қазір жобалық-сметалық құжаттамаға түзету енгізіліп жатыр. Бұған дейін 300 төсек орыны бар облыстық туберкулезге қарсы диспансердің құрылысы басталған. Кейін туберкулезге қарсы диспансер қажет болмай қалды. Себебі науқас саны аз. Кейін инфекциялық ауруханаға ауыстыру жоспарланды. Бірақ ел заңнамасы бойынша тек инфекциялық аурухана деп салуға болмайды. Енді инфекциялық корпусы бар облыстық аурухана болады», — деді Ақтөбе облыстық денсаулық сақтау басқармасы басшысының орынбасары Мұратжан Қажығалиаев.

Ведомство мәліметінше, биыл жобалық-сметалық құжатқа түзету енгізіледі. Содан кейін ғана қаржы сұралады. Қаржысы бастапқыдан көбірек болуы мүмкін. 

Аурухана 300 төсек орынға жоспарланған. Оның 200  орны инфекциялық ауруы бар науқастарға арналады. 100-і ересектерге, 100-і балаларға. Ал қалған 100 орын инфекциялық ауруларға тығыз байланыста болатын бөлімдерге арналады.

Мемлекеттік сатып алу порталында жоба шарты 2016 жылы жасалғаны көрсетілген. Ақтөбе облысы құрылыс, сәулет және қала құрылысы басқармасының 2016 жылғы басшысы Серік Төленбергенгенов пен мердігер компания ANTARES PLATINUM ЖШС шарт жасасып, қол қойған. Құрылыс екі жылда аяқталуы тиіс болған.

Айта кетейік, Серік Төленбергенов 2016 жылы Ақтөбе облысы құрылыс, сәулет және қала құрылысы басқармасының басшысы болды. 2017-2019 жылдары Ақтөбе облысы әкімінің орынбасары болды.Қазір ол Төтенше жағдайлар вице-министрі болып отыр.

Автор: Ардақ Ерубаева