10 наурызда көктемгі ҰБТ басталады

Көктемдегі ҰБТ 10 наурыз бен 10 сәуір аралығыгда өтеді, деп хабарлады БҒМ баспасөз қызметі.  Жоғары оқу орнының ақылы бөліміне түсуді жоспарлаған талапкерлер үшін наурыз айындағы Ұлттық бірыңғай тестілеу компьютер форматында өтеді.

 Бұған дейін көктем айындағы тестілеу  10 күн ғана болғанын ескерсек, биылғы  қатысушыларға 1 ай уақыт берілген. Наурыздағы ҰБТ-ға қатысу үшін app.testcenter.kz сілтемесі бойынша тіркелу керек.

Пәндер саны әдеттегідей бесеу: үш міндетті және екі бейіндік пән бойынша тестілеу жүргізіледі. Тестілеуге жалпы 4 сағат (240 минут) беріледі. Максималды балл – 140.

— ЖОО-ның ақылы бөліміне оқуға түсуге ниет білдіргендер Ұлттық тестілеу орталығының сайты арқылы тіркеле алады. Көктемдегі ҰБТ 10 наурызда басталып, 10 сәуірге дейін жалғасады. Тестілеу электрондық форматта «бір тестіленуші – бір компьютер – бір камера« қағидасы бойынша өтеді. Сондай-ақ прокторинг жүйесі қолданылады, бейнебақылау орнатылады. Тұлғаны цифрлық сәйкестендіру жүйесі – Face ID ҰБТ-ға қатыспақ болған бөтен адамдарды анықтауға мүмкіндік береді. Осының барлығы академиялық адалдық қағидаларының сақталуын бақылауды күшейтуге жағдай жасайды», – деді ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев.

ҰБТ өткізу кезінде санитарлық талаптар қатаң сақталатын болады.