10 млн гектар орман алқабы жайылымға беріледі

Еліміздегі орман қоры ретінде арнайы қорғауға алынған алқаптың 10 млн гектары жайылымға берілетін болды. Төрт түлік малмен күн көріп отырған халыққа жағдай жасалады.

Мәселе Жер реформасы жөніндегі комиссиясының үшінші отырысында қаралды. Дегенмен  жергілікті билік бюрократиялық кедергілерді жойып, шаруаның ретке қоюы қажет.

Жиынға Премьер-Министрдің орынбасары Ералы Тоғжанов төрағалық етті. Отырысқа Парламент депутаттары, облыс әкімінің орынбасарлары және қоғам белсенділері қатысуда.

Экономикалық жұмыс тобының жетекшісі Ақылбек Күрішбаевтың айтуынша, елдегі орман алқабының жалпы аумағы 41 млн гектарға жетеді. Соның 10 миллионы жайылымға арналған жерлер. Алайда жергілікті билік жағдайды тиімді пайдалануды жолға қоймаған.

Қазіргі таңда мемлекеттік орман қорынан 2,7 млн гектар алқап жергілікті шаруаларға берілген. Оның 430 мың гектары ұзақ мерзімді келісім-шарт негізінде алынған. Келісім-шарт қысқа мерзімге жасалмайды, яғни 49 жылға дейін шаруалар малдарын  жаятын жер бар. Жергілікті әкімдіктер 1 жылмен ғана шектеліп, тұрғындардың кәсібін өрістетуге кедергі болып келген.