1 сәуірге дейін көлік салығын төлемесе не болады?

1 сәуір - жеке тұлғалар үшін 2021 жылға арналған көлік салығын төлеудің соңғы мерзімі. Мемлекеттік кірістер комитеті сайтында төлемді кешіктіру қосымша шығындарға және шоттардың жабылуына әкелетіні айтылған.

Біріншіден, салық органдары борышкерлерге салық берешегі туралы хабарлама жібереді. 3063 теңгеден (1 АЕК) асатын берешегі болса, хабарлама жеткізілгеннен кейін 30 жұмыс күн аралығында  мәжбүрлеп орындату үшін салықтық ұйғарым жасалып, борышкерге жолданады.

«Хабарлама жеткізілгеннен кейін 5 жұмыс күні ішінде берешек өтелмеген жағдайда, салықтық ұйғарым орындалу үшін жеке сот орындаушыларына беріледі. Бұл ретте жеке сот орындаушылары берешек сомасынан бөлек, есепшотқа тыйым салудан туындаған келеңсіздіктерді айтпағанда, салық берешегі сомасының 25%-ға дейінгі мөлшерінде төлемді қосымша өндіріп алады»  деп түсіндірді комитетте.

Көлік құралдары салығы сомасын kgd.gov.kz веб-порталындағы есептегіштің  және e-Salyq Azamat мобильді қосымшасының көмегімен дербес есептеуге болады.