1 наурызда бүкіл Қазақстан бойынша дабыл қағылады

1 наурыз сағат 9.00-ден 12.00-ге дейін Дүниежүзілік азаматтық қорғаныс күні шеңберінде азаматтық қорғауды құлақтандыру жүйесіне республикалық тексеру жүргізіледі. Бұл туралы ҚР Төтенше жағдайлар министрлігінің баспасөз қызметі хабарлады.

– Халықты құлақтандыру және хабардар ету – тұрғындарды табиғи құбылыстардың әртүрлі факторлары әсерінен болатын апаттың немесе жойқын әсердің теріс салдарынан қорғауға мүмкіндік беретін негізгі қауіпсіздік шарасы. Құлақтандыру жүйесін тексеру барысында электр дабылдарын және сиреналық-сөйлеу құрылғыларын (дауыс зорайтқыштарды) қысқа мерзімге қосу, сондай-ақ теледидар және радиоарналарының эфирін ұстап алуды жүзеге асыру, интернет-ресурстар мен мобильді қосымшаларда ақпаратты орналастыру көзделеді, - делінген хабарламада.

Төтенше жағдайлар министрлігінің мәліетінше, бұл уақыт аралығында құлақтандыру жүйелерінің жарамдылығы тексерілетін болады.

– Сонымен қатар, қауіпті өндірістік нысандар мен гидротехникалық құрылымдардағы жергілікті құлақтандыру жүйелерінің жарамдылығы тексерілетін болады. Құлақтандыру жүйесіне республикалық тексеру жүргізу құлақтандыру жабдығын әзірлікте ұстауға және халықты ықтимал төтенше жағдайлардан қорғауға бағытталған, - деп хабарлады министрлік.