«1 млрд жымқырды»: Экс-судья Жолмановаға прокурор қандай жаза сұрады?

Алматы қаласы Медеу аудандық №2 сотында экс-судья Светлана Жолмановаға қатысты қылмыстық іс бойынша жақында тараптардың жарыссөз кезеңі өтті. Мемлекеттік айыптаушы Жолмановаға орташа қауіпсіздік деңгейіндегі мекемеде 6 жыл 8 ай бас бостандығынан айыру жазасын сұрады, деп хабарлайды Orda.kz.

Светлана Жолманова 2021 жылдан 2024 жылға дейін жасалған 48 алаяқтық қылмыс бойынша айыпталып жатыр. Айыптау актісінде оның тұрғын үй сатып алуға жәрдемдесу және жалған тендерлік жобаларға қатысуды ұсыну арқылы шамамен 1 миллиард теңгені заңсыз иемденгені көрсетілген.

«Нақты сома белгісіз. Себебі кейбір жәбірленушілер талап-арыздан бас тартты. Ал кейбірі залал көлемін нақтылауы керек болғанымен, оны жасамады. Сондықтан сот шешімін күтеміз», — деді Жолманованың адвокаты Эльдар Ганбаров.

Бұған дейін адвокаттың айтуынша, Жолманова айыптау актісін қарап шығудан бас тартқан. Келесі сот отырысында айыпталушыға соңғы сөз беріледі.