1 қыркүйектен бастап 1-4 сынып оқушылары тегін тамақпен қамтамасыз етіледі

Премьер-Министр Әлихан Смайылов «AMANAT» партиясы фракциясының кеңейтілген отырысына қатысып, депутаттарды Қасым-Жомарт Тоқаевтың 2019-2022 жылдарға арналған жолдауының орындалу барысы туралы хабардар етті. 

Әлихан Смайылов Мемлекет басшысының жолдауларын іске асыру шеңберінде әлеуметтік салада жүйелі шаралар қабылданғанын атап өтті. Балалары бар отбасыларды әлеуметтік қолдау үшін бала күтіміне берілетін уақыт 1,5 жасқа дейін ұлғайтылған. Көп балалы аналарға берілетін жәрдемақы артты. Бүгінде бұл жәрдемақыны 750 мыңнан астам ана алады.

«1 қыркүйектен бастап жалпы білім беретін мектептердің 1-4-ші сыныптағы балалары тегін тамақтандырумен қамтамасыз етіледі. Сондай-ақ, ағымдағы жылы әлеуметтік жағынан осал отбасылардан шыққан 97 мың баланың балабақшаларда тегін тамақтану мәселесі шешілді. Мемлекет басшысының тапсырмасы бойынша мүгедектігі бар және асыраушысынан айырылған адамдарға берілетін әлеуметтік жәрдемақы 23%-ке артты. 2 миллионнан астам зейнеткердің зейнетақысын саралап арттыру жүргізілді»,-  деді Үкімет басшысы.

Сондай-ақ биылғы жылдың басынан бастап Үкімет Отбасының цифрлық картасын енгізді. 500 мыңнан астам қазақстандыққа  белсенді  әлеуметтік қолдау көрсетілді.