1 қыркүйекте мұғалімдерге гүл сыйлауға бола ма? Оқу-ағарту министрлігі жауап берді

1 қыркүйекте алғашқы қоңырауда мұғалімдерге гүл шоғын сыйлауға болады. Алайда бұл әр баланың және оның ата-анасының ерікті таңдауы болуы керек, деп хабарлайды Orda.kz Оқу-ағарту министрлігі берген жауапқа сүйеніп.

Министрлік Білім күнінде мұғалімдерге гүл сыйлауды «жақсы дәстүр» деп атады. Алайда бұл дәстүр міндетке, жарысқа немесе ата-аналарға артық шығын әкелетін жағдайға айналмауы тиіс.

«Бастысы – гүл шоқтарының көлемі мен бағасы емес, баланың мұғалімге деген құрметі. Сондықтан гүл сыйлау туралы шешім әр баланың және оның ата-анасының ерікті таңдауы болып қалуы керек»,  деп мәлімдеді ведомство. 

Оқу-ағарту министрлігі мектептер гүл немесе сыйлық сатып алуды ұйымдастырмауы, оған ақша жинамауы және мұндай шығындарды ата-аналарға жүктемеуі керектігін де еске салды.

«Біздің мақсатымыз – оқу жылының алғашқы күнін артық сән-салтанатсыз, жылы әрі жайлы атмосферада өткізу. Сонымен бірге бұл күннің тәрбиелік мәнін сақтап, балаларға мұғалімді құрметтеуді, қарапайымдылық пен мейірімділікті үйрету» деп жазылған министрлік хабарламасында.

Айта кетейік, 28 тамызда Оқу-ағарту министрінің бірінші вице-министрі Шынар Ақпарова Орталық коммуникациялар қызметінде өткен брифингте мектеп қабырғасында мұғалімдерге гүл мен сыйлық беруге жол берілмейтінін мәлімдеген еді. Оның айтуынша, осыған қатысты тиісті хаттар жергілікті атқарушы органдарға жолданған.

Мұғалімдерге гүл сыйлау мәселесіне бұған дейін саясаттанушы Ғазиз Әбішев те пікір білдірген. Ол гүл сыйлауды міндетті деп санамайтынын, алайда ата-аналар мен балалардың гүл сыйлау немесе сыйламау мәселесін өздері шешу құқығын қолдайтынын жазды.

Саясаттанушының айтуынша, көптеген отбасы бұл дәстүрді ондаған жыл бойы сақтап келеді. Ал мектептегі алғашқы жиынға гүлсіз келген адамдарға қатысты қоғамда айтарлықтай қысым немесе жағымсыз көзқарас қалыптаспаған.

«Әркім қаласа – гүл сыйлайды, қаламаса немесе мүмкіндігі болмаса – сыйламайды. Мен өзім гүлді міндетті деп санамаймын және гүл сыйламайтын адамдар туралы ешқандай жаман ойым жоқ. Бірақ гүл сыйлағысы келетіндердің бұл құқығын құрметтеймін», – деп қосты Әбішев. 

Саясаттанушы сондай-ақ мұндай шектеулер 8 наурызда да қолданыла ма деген сұраққа жауап берді. Оның пікірінше, егер мектептерде мұғалімдерге гүл мен сыйлық сыйлауға шектеу қойылса, онда осы талаптың Оқу-ағарту министрлігінің өз іс-шараларында да сақталуы мәселесі туындайды.

Оқи отырыңыз:

• Құрылтайда сегіз тұрақты комитет құрылып, төрағалары сайланды
• Құрылтай төрағасы болып Айбек Дәдебай сайланды