1 ақпаннан бастап еліміздің батыс өңірлерінде автогаз қымбаттады

1 ақпаннан бастап Қазақстанның батыс өңірлері – Атырау, Маңғыстау және Ақтөбе облыстарында автогаз қымбаттады, деп хабарлайды Orda.kz.

Сұйытылған мұнай газы автокөліктерге отын ретінде пайдаланылатыны белгілі. Маңғыстау облысында Энергетика министрлігінің бұйрығына сәйкес 1 ақпаннан бастап сұйытылған газдың литрі 59 теңгеден 65 теңгеге дейін көтерілді. Осылайша сұйытылған газдың бағасы 6 теңгеге қымбаттады.

Ақтөбе облысында газ бағасы 18 теңгеге қымбаттады. Ал енді ол 77 теңге болады. Бұрын мұнда автогаз 59 теңгеден сатылған. Облыс орталығынан 200 шақырым қашықтықтағы аудандар үшін газ бағасы бұдан да жоғары – 82 теңге (бұрынғы баға 64 теңге) болады.

Атырау облысында сұйытылған газдың бағасы 77 теңге болмақ. Бұрын жанармайдың бұл түрі ол жақта 59 теңгеден сатылған.

Айта кетейік, 1 ақпаннан бастап Қазақстанда бензин, дизельдік отын және автогаздың бөлшек сауда бағасы өзгерді.

ҚР Энергетика министрлігі түсіндіргендей, сұйытылған мұнай газының бағасы «өндірістің нақты өзіндік құнына бейімделу үшін» 1 ақпаннан бастап көтеру жоспарланған.

«Энергетика министрінің бұйрық жобасына сәйкес сұйытылған газдың шекті көтерме бағасы тоннасына 45 158 теңгеден 51 932 теңгеге дейін өседі. Бөлшек сауданың шекті бағасы аймаққа байланысты 6 теңгеден 21 теңгеге дейін көтеріледі»,  деп хабарлады Энергетика министрлігі.