Қазақстанда 2022 жылдың 1 қаңтарынан бастап Салық кодексінің шетелдік интернет-компаниялардың Қазақстанда сатылған тауарлар, жеке тұлғаларға көрсеткен қызметтері үшін салық төлеу жөніндегі міндеттемелері туралы нормалары күшіне енеді.
Ұлттық экономика министрлігінің мәліметінше, онлайн платформалар арқылы қызметтер мен тауарларды сататын барлық шетелдік компаниялар Қазақстан бюджетіне салық төлеуге міндетті болады. Сатылған тауарлар мен қызметтер сомасына салық 12% құрайды. Бұл норма қазақстандық төлеушілерге әсер етпейді.
– Төлем тәртібі өте қарапайым. Компаниялар салық салу мақсатында тіркелмейді. Оңайлатылған тәртіпте олар салық органдарына хат жолдап, салық төлеуге дайын екендігі туралы хабарлайды, – деді Ұлттық экономика министрлігінің вице-министрі Азамат Әмрин.
Әкімшілік шетелдік интернет-компаниялар контекстінде аударылған сомалар туралы банктердің деректері негізінде жүзеге асырылатын болады.
Ұлттық экономика министрлігінің болжамы бойынша, осы ҚҚС салығы бойынша бюджетке түсетін түсімдер жылына 2 млрд теңгені құрайды.
2021 жылғы 25 қарашада Сенат Салық кодексіне интернет арқылы сатылатын тауарларға цифрлық салықты енгізуді көздейтін түзетулерді қабылдады.
