1,5 миллион адам коронавирусқа қарсы екпе алды

Денсаулық сақтау министрі Алексей Цой Қазақстандағы вакциналауға қатысты жағдай туралы айтты, деп хабарлады Orda.kz.

Бүгінгі күні қазақстандықтарға Спутник V, QazVaq және Hayat-Vax деген үш вакцина қол жетімді.

– 1,5 млн-ға жуық азамат немесе вакциналауға жататын халықтың 15%-ы екпе алды. Вакцина жоспарға сәйкес жеткізілуде, сәуірдің аяғында 2,3 млн доза вакцина жеткізілді. Елде вакциналау қарқын алуда. Сонымен, 1 сәуірден бастап тәулігіне бірінші және екінші дозалармен вакциналанған адамдардың саны 12 есеге өсті, яғни күніне 11 мыңнан 135 мың адамға дейін, - деді Денсаулық сақтау министрі үкімет отырысында.

Министрдің айтуынша, вакциналауға барлығы 11 мың медициналық қызметкер, мыңнан астам стационарлық вакциналау пункті және 400 мобильді пункт қатысады. Егу пункттері екі ауысымда сағат 24:00-ге дейін және демалыс күндері жұмыс істейді.

Қазақстанда вакциналау науқаны басталғалы бері 1,8 млн доза вакцина қолданылды.