Жұмысқа жарамды адамды мемлекет асырамайды – Бектенов

Премьер-министр Олжас Бектенов әлеуметтік көмек тек еңбекке қабілетсіз азаматтарға ғана көрсетілуі керек екенін айтты, деп хабарлайды Orda.kz.

Бектеновтің айтуынша, мемлекет тек объективті себеппен еңбекке жарамсыз азаматтарды қолдауға міндетті. Ал жұмыс істеуге мүмкіндігі бар адамдар әлеуметтік көмекті күтпей, өз еңбегімен күн көруі тиіс.

Бектеновтің сөзінше, республика бюджеті жылдар бойы шығынның 40%-дан астамын әлеуметтік қолдауға жұмсап келіпті. Үш жылдық бюджетті дайындау кезінде бұл көрсеткіш 38%-ға дейін төмендетілген. Алайда, премьер-министрүкіметтің бұл бағытта әлі де жұмысты жалғастыратынын айтты. 

«Мемлекеттік әлеуметтік қолдау тек объективті себеппен жұмыс істей алмайтын адамдарға көрсетіледі. Ал еңбекке қабілетті азамат жұмыс істеуі керек», – деді Бектенов.

Сонымен бірге ол жаңа бюджетте негізгі шығындардың үлесі 15%-дан 12%-ға азайғанын, бірақ соған қарамастан мемлекеттік қаражаттың шамамен 60%-ы әлеуметтік төлемдер мен халықты қолдауға бағытталып жатқанын атап өтті.