«Жат ағымдағы өгей әке»: Қарағандыда 15 жастағы қызға үйленген ер адам сотталады

Қарағандыда 15 жастағы қаршадай қызды қалыңдық қылып алған ер адамның үстінен қылмыстық іс қозғалды, деп хабарлайды Orda.kz.

Қарағанды сотында 15 жастағы қызын тұрмысқа берген ата-ананың ісі қаралып жатыр. Қалыңдық 38 жастағы ер адамға өз қалауынсыз тұрмысқа шыққан.Оны ажырасып, қайта тұрмыс құрған анасы мен өгей әкесі тұрмысқа берген. Алайда қыз ұзатылған соң 5 күн өткен соң туған әкесіне қашып барған. Әкесі полицияға барып, бұрынғы әйелі мен оның күйеуінің үстінен арыз жазды. 

Ал білім бөлімі қыздың анасын ата-ана құқығынан айыруды талап етіп отыр. 

Қыздың туған әкесі қыздан бөлек бұрынғы әйелінің қолында қалған барлық балаларын да өз қолына алғысы келеді. Ал әйелдің екінші отбасынан тағы 2 баласы бары белгілі болды. 15 жастағы қызға үйленген ер адам Астанаға қашып бара жатқан жерінен ұсталды. Ол қазір тергеу абақтысына қамалған. 

Қыздың өгей әкесі, анасы және «күйеу жігіт» жат діни ағымның өкілдері болып шықты. Олар өздері ұстанатын діннің тәртібімен жас қызды тұрмысқа бердік деп отыр. 

Айта кетейік, жақында ғана Оңтүстік Корея азаматына тұрмысқа шыққан қазақстандық көз жұмған еді.