Жапонияда қалың қардан қаза тапқандар саны 35 адамға жетті

Жапонияда соңғы күндері жауған қалың қар салдарынан қаза тапқандар саны 35 адамға жетті, деп хабарлайды  Orda.kz Anadolu агенттігіне сілтеп.

Елдің өрт және табиғи апаттарды басқару агенттігінің мәліметінше, соңғы 20 күн ішінде қатты қар жаууына байланысты жол-көлік оқиғалары мен түрлі төтенше жағдайлар тіркеліп, 358 адам жарақат алған.

Ең көп адам шығыны Ниигата префектурасында тіркелген, онда 12 адам қаза тапқан. Акита префектурасында 7 адам, Ямагатада 5 адам көз жұмды. Хоккайдо мен Аомориде әрқайсысында 4 адамнан қайтыс болған. Сондай-ақ Ивате, Нагано және Симане префектураларында бір адамнан қаза тапқаны хабарланды.

Жапонияның метеорологиялық агенттігі оңтүстіктен келген жылы ауа массасының әсерінен ауа температурасы көтерілгенін мәлімдеп, азаматтарды қар көшкіні қаупіне және ғимараттардың шатырларынан қардың құлап кетуіне байланысты сақ болуға шақырды.

Оқи отырыңыз:

• Токиоға алғашқы қар жауды - жапондықтар үшін бұл ерекше құбылыс
• Қар мен көктайғақ салдарынан бүкіл Еуропа әрекетсіз қалды
• «Қаза тапқандар бар»: Сеулде 100 жылдағы ең қалың қар жауды