26 қазан күні тіркелмеген «Демократиялық партия» жетекшісі, белсенді, саясаткер Жанболат Мамайдың үстінен қылмыстық іс ашылып, полиция департаментіне шақырылған болатын.
Orda.kz журналистері оқиға орнына келіп, Қазақстанда тіркелмеген Демпартия жетекшісінен қылмыстық іс пен полицияның жауап алуы туралы пікірін сұрады.
Жанболат Мамай полиция департаментінен шыққаннан кейін Orda.kz журналистеріне оқиғаның мән-жайын айтып берді.
– Тергеуден шықтым. Мұсақанов деген тергеуші болды. Мен жауап беруден бас тарттым. Олар қандай айып тағып отыр? 18 қыркүйек күні Абай есткерткішінің алдында «полиция қызметкерлері Отанына опасыздық жасап жүр. Олар қарабеттер» деп айттым. Сол сөзім полиция қызметкерлерін қорлау, ар-намысына тию деп бағаланып, қылмыстық іс қозғап отыр, – деді Демпартия жетекшісі.
Мамайдың айтуынша, бұл 16 желтоқсанда болуы мүмкін митингке байланысты алдын ала жасалып жатқан шара.
– 16 желтоқсан келе жатыр. Тәуелсіздігіміздің – 30 жылдығы, Желтоқсан оқиғаларына – 35 жыл, Қазақстанда болған қанды оқиға – Жаңаөзен қырғынына 10 жыл болады. Халық алаңға шығып, наразылық танытып, митинг ұйымдастырады деп, алдын ала осындай қылмыстық істер қозғады. Бұл мені қамаудың бірден-бір амалы деп ойлаймын, – деді Жанболат Мамай.
Сонымен қатар, қылмыстық іс бойынша филологиялық сараптама өтеді. Сараптама қорытындысы сотқа жіберіліп, үкім шығады.
